काठमाडौं । नेपाली क्रिकेट टोली आईसीसी क्रिकेट विश्वकप २ लिग को शीर्ष ४ मा नपर्ने पक्का भएको छ ।
शुक्रबार भएको लिग २ अन्तर्गतको खेलमा ओमानले क्यानडालाई हराएसँगै नेपाल शीर्ष ४ मा पर्ने सम्भावना सकिएको हो । नेपालले अब सिधै विश्वकप छनोट खेल्न पाउने छैन ।
नेपाली टोलीले अब प्लेअफ मार्फत विश्वकप छनोटको यात्रा तय गर्नुपर्नेछ । यसअघि नेपाल शीर्ष ४ भित्रै रहेर छनोट खेलेको थियो ।
क्यानडालाई हराएपछि ओमानको २९ खेलबाट ३३ अंक भएको छ । नेपालको ३२ खेलबाट २४ अंक छ र नेपाल सबै खेल जित्दा पनि अधिकतम ३२ अंकसम्म मात्र पुग्न सक्छ ।
लिग २ को अंकतालिकामा शीर्ष ३ टोलीको टुङ्गो यसअघि नै लागिसकेको छ । अमेरिका ३४ खेलबाट ४७ अंकसहित लिग २ को च्याम्पियन बनिसकेको छ । स्कटल्यान्डको ३६ खेलबाट ४५ अंक छ भने नेदरल्यान्ड्सको ३२ खेलबाट ३८ अंक छ ।
चौथो स्थानको ओमानको २९ खेलबाट ३३ अंक, पाँचौंको नामिबियाको ३४ खेलबाट २९ अंक, छैटौंको क्यानडाको ३३ खेलबाट २५ अंक छ । नेपाल ३२ खेलमा २४ अंकसहित सातौंमा छ भने यूएई ३० खेलबाट १९ अंकसहित आठौंमा छ ।
लिग २ मा अहिले अमेरिका, नामिबिया र यूएईबीचको शृङ्खला पनि भइरहेको छ । आजै राति नामिबिया र यूएईबीच पनि खेल हुँदै छ ।
नेपालले भने आइतबार क्यानडासँग खेल्नेछ ।
